జెపీ అగ్రహారం గ్రామసభలో ఉద్రిక్తత.రీ సర్వే పై రైతుల ఆగ్రహం.

అనకాపల్లి జిల్లా రోలుగుంట మండలం జె.పి. అగ్రహారం గ్రామంలో భూముల రీ-సర్వేపై నిర్వహించిన గ్రామసభ ఉద్రిక్తంగా మారింది. దశాబ్దాలుగా పరిష్కారం కాని భూ సమస్యలకు రీ-సర్వే ద్వారా ముగింపు పలకాలని అధికారులు ప్రయత్నించగా.. తమ భూములపై స్పష్టత ఇవ్వకుండా సర్వే ఎలా నిర్వహిస్తారని రైతులు అధికారులను నిలదీశారు. దీంతో సభలో తీవ్ర వాగ్వాదం చోటుచేసుకుని రైతులు గ్రామసభను బహిష్కరించి బయటకు వెళ్లిపోయారు.స్థానిక రామమందిరంలో ఆర్డీవో వి.వి. రమణ, తహసీల్దార్ నాగమ్మ సమక్షంలో నిర్వహించిన సమావేశంలో జె.పి. అగ్రహారం ఇనాం భూములకు సంబంధించిన రీ-సర్వే వివరాలను అధికారులు రైతులకు వివరించారు. ప్రభుత్వం రైతుల సౌలభ్యం కోసం రీ-సర్వే చేపడుతోందని, ఎలాంటి అపోహలకు తావులేకుండా సర్వేకు సహకరించాలని ఆర్డీవో కోరారు.అయితే రైతులు మాత్రం తమ ఆవేదనను అధికారుల ముందు వెళ్లగక్కారు. తరతరాలుగా సాగు చేస్తున్న భూములకు పట్టాలు ఇవ్వకపోవడం, పట్టాదారు పాస్‌పుస్తకాల జారీలో జాప్యం, గతంలో ఇచ్చిన హామీలు అమలు కాకపోవడం, పాత రికార్డుల పేరుతో కాలయాపన చేస్తున్నారని ఆరోపించారు. తమ వద్ద తాతల కాలం నాటి భూ రికార్డులు ఉన్నాయని, వాటిని పరిశీలించి వాస్తవ సాగుదారుల హక్కులను పరిగణనలోకి తీసుకోవాలని బుచ్చిరాజు, శంకర్రావు, ఆర్.టి. నాయుడు తదితరులు కోరారు.జె.పి. అగ్రహారం ఇనాం గ్రామం కావడంతో భూ రికార్డుల విషయంలో దశాబ్దాలుగా వివాదాలు కొనసాగుతున్నాయని రైతులు తెలిపారు. 1969 తర్వాత వెలువడిన వివిధ ఉత్తర్వులు, సబ్‌కలెక్టర్ స్థాయి నిర్ణయాలు, అనంతరం జరిగిన న్యాయపరమైన పరిణామాలతో భూముల యాజమాన్యంపై స్పష్టత కొరవడిందని పేర్కొన్నారు. గ్రామంలోని సుమారు 468 ఎకరాల భూములకు సంబంధించిన రికార్డులు పూర్తిగా పరిష్కారం కాలేదని రైతులు ఆవేదన వ్యక్తం చేశారు.2014-15లో కొంతమంది సాగుదారులకు పాస్‌పుస్తకాలు జారీ చేసినప్పటికీ అనంతరం మళ్లీ వివాదాలు తలెత్తాయని రైతులు తెలిపారు. ఈ వ్యవహారం హైకోర్టు వరకు వెళ్లడంతో సమస్య మరింత సంక్లిష్టమైందని పేర్కొన్నారు.ఈ అంశాలపై రైతులు అధికారులను గట్టిగా ప్రశ్నించడంతో సభలో ఒక్కసారిగా ఉద్రిక్తత నెలకొంది. పరిస్థితి అదుపు తప్పకుండా పోలీసులు జోక్యం చేసుకుని రైతులను సముదాయించే ప్రయత్నం చేశారు. అయినప్పటికీ తమకు సరైన సమాధానాలు లభించలేదని ఆగ్రహించిన రైతులు గ్రామసభను బహిష్కరించి అక్కడి నుంచి వెళ్లిపోయారు. అనంతరం అధికారులు కూడా సమావేశాన్ని ముగించి వెనుదిరిగారు.2022 నుంచి రాష్ట్రవ్యాప్తంగా కొనసాగుతున్న రీ-సర్వేలో భాగంగా జె.పి. అగ్రహారం గ్రామాన్ని చివరి దశలో చేర్చినట్లు అధికారులు తెలిపారు. భూ రికార్డులను స్పష్టీకరించడం, యాజమాన్య హక్కులను నిర్ధారించడం, అర్హులైన రైతులకు పట్టాలు, పాస్‌పుస్తకాలు అందించడమే రీ-సర్వే లక్ష్యమని వివరించారు.సభ అనంతరం రైతులను తమ వద్ద ఉన్న పాత భూ రికార్డులతో మంగళవారం కార్యాలయానికి రావాలని ఆర్డీవో సూచించినట్లు బుచ్చిరాజు, శంకర్రావు తెలిపారు. సాగులో ఉన్న తమ భూములను ఖాళీ చేసే ప్రసక్తే లేదని, సమస్యకు తుది పరిష్కారం వచ్చే వరకు పోరాటం కొనసాగిస్తామని రైతులు స్పష్టం చేశారు.జె.పి. అగ్రహారం భూ సమస్య కేవలం రీ-సర్వేతోనే పరిష్కారమవుతుందా.. లేక పాత రికార్డులు, కోర్టు వ్యవహారాలు, పట్టాల జారీపై సమగ్ర నిర్ణయం తీసుకోవాల్సి ఉంటుందా అన్నది ఇప్పుడు కీలకంగా మారింది. రైతుల అభ్యంతరాలను పరిగణనలోకి తీసుకుని అధికారులు పారదర్శకంగా ముందుకు వెళ్తేనే రీ-సర్వేకు సార్థకత చేకూరనుంది.ఈ కార్యక్రమంలో ఆర్డీవో రమణ, తహసీల్దార్ నాగమ్మ, ఆర్‌ఐ చెన్నయ్య పడాల్, వీఆర్వోలు, సర్వేయర్లు, పోలీసు సిబ్బంది, రైతులు, గ్రామస్తులు పాల్గొన్నారు.