జగ్గంపేట, సెప్టెంబర్ 26: కాకినాడ జిల్లా జగ్గంపేట మండలం మర్రిపాక స్వర్ణ గ్రామంలో అంగన్వాడీ సేవలు మరియు సంక్షేమ పథకాలపై అవగాహన సదస్సు ఘనంగా నిర్వహించారు. సీడీపీఓ పూర్ణిమ ఆధ్వర్యంలో జరిగిన ఈ కార్యక్రమంలో గ్రామ ప్రజలు, తల్లులు పెద్ద సంఖ్యలో పాల్గొన్నారు. ఈ సందర్భంగా సీడీపీఓ పూర్ణిమ మాట్లాడుతూ, అంగన్వాడీ కేంద్రం అంటే కేవలం పిల్లలకు ఆహారం అందించే ప్రదేశం మాత్రమే కాదని, ఇది పిల్లల ఆరోగ్యం, పోషణ, ప్రీ-స్కూల్ విద్య, తల్లుల ఆరోగ్యం మరియు కుటుంబ సంక్షేమానికి మూలస్తంభం అని స్పష్టం చేశారు. చిన్నారుల జీవితంలో మొదటి సంవత్సరాలు ఎంతో కీలకమని, వారికి మంచి ఆహారం, అలవాట్లు, ఆటల ద్వారా విద్య మరియు ప్రేమతో కూడిన వాతావరణం అందించడంలో అంగన్వాడీ కేంద్రం కీలక పాత్ర పోషిస్తుందని తెలిపారు. తల్లిదండ్రులు, తల్లుల కమిటీ, అంగన్వాడీ కార్యకర్తలు, ఆయాలు, సూపర్వైజర్లు మరియు గ్రామ ప్రజలు ఐక్యంగా పనిచేస్తేనే అంగన్వాడీ కేంద్రాలు మరింత అభివృద్ధి చెందుతాయని పేర్కొన్నారు. ప్రతిరోజూ పిల్లలను అంగన్వాడీకి పంపాలని, వారి ఎదుగుదలను గమనిస్తూ కార్యకర్తలతో నిరంతరం సంప్రదింపుల్లో ఉండాలని కోరారు. “మన పిల్లల భవిష్యత్తు – మన అంగన్వాడీ నుంచే ప్రారంభం” అని పిలుపునిస్తూ అందరూ కలిసి మర్రిపాకను ఆదర్శ అంగన్వాడీగా తీర్చిదిద్దాలని ఆకాంక్షించారు. కేంద్ర ప్రభుత్వ సంక్షేమ పథకాలను సద్వినియోగం చేసుకోవాలి. బీజేపీ మండల ప్రెసిడెంట్ పల్లా రాము ముఖ్య అతిథిగా పాల్గొని కేంద్ర ప్రభుత్వ సంక్షేమ పథకాల గురించి వివరించారు. ప్రధాన మంత్రి మాతృత్వ వందన యోజన (PMMVY): ప్రభుత్వ ఆసుపత్రిలో డెలివరీ జరిగే గర్భిణీలకు ఈ పథకం ద్వారా రూ. 5,000 ఆర్థిక సహాయం అందుతుందని తెలిపారు. మిషన్ వత్సల్య పథకం: 18 సంవత్సరాల లోపు వయసు ఉన్న అనాథ పిల్లల కోసం ఈ పథకం వర్తిస్తుందని, అర్హులైన వారు ఎవరైనా ఉంటే సీడీపీఓను సంప్రదించి దరఖాస్తు చేసుకోవాలని సూచించారు. ప్రభుత్వ పథకాలను ప్రజలంతా సద్వినియోగం చేసుకోవాలని కోరారు. ఘన సన్మానం మరియు ప్రముఖుల భాగస్వామ్యంకార్యక్రమంలో భాగంగా గర్భిణీలు, బాలింతలు మరియు ప్రీ-స్కూల్ పిల్లలకు సేవలు అందిస్తున్న అంగన్వాడీ కార్యకర్తలను ఘనంగా సన్మానించారు. ఈ కార్యక్రమంలో మాజీ ఎంపీటీసీ పైల రామకృష్ణ, మాజీ సర్పంచ్ బండారు చిన్నయ్య, గ్రామ పెద్దలు కాపారపు ప్రకాశం, వీరాంజనేయులు, పంచాయతీ సెక్రటరీ ఉషారాణి, మహిళా పోలీస్ మహాలక్ష్మి, ఎంఎల్హెచ్పి (MLHP) శిరీష, సూపర్వైజర్ అమ్మాజీ, ఏఎన్ఎం (ANM), ఆశా కార్యకర్తలు, అంగన్వాడీ వర్కర్లు మరియు తల్లులు ఉత్సాహంగా పాల్గొన్నారు.
