పాఠశాలలకు, అంగన్‌వాడీ కేంద్రాలకు శుక్రవారం సెలవు:జేసీ ప్రశాంత్ కుమార్

పోలవరం జిల్లావాణీ ప్రతినిథి: పోలవరం జిల్లాలో తుఫాను, భారీ వర్షాల పరిస్థితుల నేపథ్యంలో శుక్రవారం జిల్లాలోని అన్ని పాఠశాలలు, అంగన్‌వాడీ కేంద్రాలకు సెలవు ప్రకటిస్తున్నట్లు జిల్లా జాయింట్ కలెక్టర్ ఎస్. ప్రశాంత్ కుమార్ గురువారం ఒక ప్రకటనలో తెలిపారు. ఈ నేపథ్యంలో శుక్రవారం నిర్వహించాల్సిన జాతీయ నులిపురుగుల నివారణ దినోత్సవం (డీ-వార్మింగ్ డే) కార్యక్రమాన్ని కూడా వాయిదా వేస్తున్నట్లు ఆయన తెలిపారు. జిల్లాలో తుఫాను ప్రభావం, వర్షాల పరిస్థితులు అదుపులోకి వచ్చిన అనంతరం మరో రోజున ఈ కార్యక్రమాన్ని నిర్వహిస్తామని పేర్కొన్నారు. విద్యార్థులు, చిన్నారుల భద్రతను దృష్టిలో ఉంచుకుని పాఠశాలలు, అంగన్‌వాడీ కేంద్రాలకు సెలవు ప్రకటించినట్లు జాయింట్ కలెక్టర్ తెలిపారు. వాయిదా వేసిన నులిపురుగుల నివారణ కార్యక్రమాన్ని నిర్వహించే తేదీని పరిస్థితులను సమీక్షించిన అనంతరం తెలియజేస్తామని ఆయన పేర్కొన్నారు.