జగ్గంపేట, కాకినాడ జిల్లా కిర్లంపూడి మండలంలో గత ఏడాది వెలుగుచూసిన భారీ గంజాయి స్మగ్లింగ్ కేసులో పోలీసులు మరో కీలక నిందితుడిని అరెస్ట్ చేశారు. రాజస్థాన్కు చెందిన ముఠాతో సంబంధాలు కలిగి ఉండి, గంజాయి సరఫరాలో ప్రధాన పాత్ర పోషించిన **చెల్లూరి నాగేశ్ బాబు (A8)**ను శుక్రవారం బురుగుపూడి గ్రామ శివారులో పోలీసులు అదుపులోకి తీసుకున్నారు.20 సెప్టెంబర్ 2025న కిర్లంపూడి మండలం రాజుపాలెం సమీపంలోని ముక్కోలు పుంత రోడ్డు వద్ద పోలీసులు తనిఖీలు చేపట్టారు. ఆ సమయంలో 355.570 కిలోల గంజాయి, ఒక ఇన్నోవా కారు (RJ50UA4616), మరియు సెల్ ఫోన్ను స్వాధీనం చేసుకున్నారు. ఈ సందర్భంగా కదం సింగ్ (A3), సువ్వన్ కంకర్ దేవి (A5), మాపీ కన్వర్ (A6)లను అక్కడికక్కడే అరెస్ట్ చేసి రిమాండ్కు తరలించారు. ఈ కేసులో ప్రధాన నిందితుడైన **లాల్ సింగ్ @ సువ్వన్ లాక్ సింగ్ (A1)**ను నవంబర్ నెలలో తెలంగాణలోని భద్రాద్రి కొత్తగూడెం పోలీసులు మరో కేసులో అరెస్ట్ చేశారు. అనంతరం ఏపీ పోలీసులు అతనిని పి.టి (PT) వారెంట్పై కస్టడీలోకి తీసుకుని విచారించగా కీలక విషయాలు వెలుగులోకి వచ్చాయి. రాజస్థాన్కు చెందిన శ్రవణ్ లాల్ యాదవ్ (A2) ఆదేశాల మేరకు విశాఖ జిల్లా దాకమర్రికి చెందిన నాగేశ్ బాబు (A8) వద్ద నుండి గంజాయి సేకరించేవారని A1 వెల్లడించాడు. గంజాయి కొనుగోలు కోసం నాగేశ్ బాబు ఖాతాకు PhonePe ద్వారా ₹55,000 బదిలీ చేసినట్లు, అలాగే పలుమార్లు నగదును కవర్లలో నేరుగా అందజేసినట్లు విచారణలో తేలింది. గతంలో నిందితులు జొన్నాడ టోల్ ప్లాజా వద్ద పట్టుకోవడానికి ప్రయత్నించిన పోలీసు సిబ్బందిని కారుతో ఢీకొట్టి గాయపరిచినట్లు రికార్డులు పేర్కొంటున్నాయి. నిందితుడు నాగేశ్ బాబును అరెస్ట్ చేసిన పోలీసులు, అతనిని గౌరవ న్యాయస్థానం ముందు హాజరుపరుస్తున్నట్లు సి.ఐ (CI) వై.ఆర్.కె తెలిపారు. ఈ కేసులో ఇంకా పరారీలో ఉన్న శ్రవణ్ లాల్ యాదవ్ (A2), జై సింగ్ (A4), అనితా గుర్జర్ సాహెబ్ (A7)ల కోసం పోలీసులు గాలింపు చర్యలు ముమ్మరం చేశారు
